O primeiro festival feminista de arte urbana e contextual en Europa está de aniversario: este ano celebramos a súa quinta edición! Orgullosas de acadar o primeiro lustro na historia do proxecto, desexamos celebrar os logros e avances colectivos subliñando a importancia e o valor de que as mulleres ocupemos artísticamente e, durante todo o ano, o espazo público.

Para iso, neste 2023 ideamos un programa especial de actividades que, desde o simbólico mes de marzo, achegará aos concellos de Ames, Brión, Compostela e Teo, diversas actividades sempre guiadas polo desexo de activar a participación comunitaria das nosas aldeas, vilas e cidades.

O programa desta V edición inclúe a proxección dun capítulo da serie documental Museo a Ceo Aberto (Ames, 25 de abril), dous roteiros de descuberta da arte urbana feminista (Brión, 8 de maio e Compostela, 27 de maio), un coloquio en torno a publicación Cando elas toman os muros: feminismo e arte urbana en Galicia (Compostela, no mes de setembro) e a estrea do Familia Delas Fest, que inclúe dous obradoiros para crianzas e as súas familias (Compostela, o 31 de agosto, e Bertamiráns, Ames, o 1 de setembro).

Como cada ano, mantemos a Convocatorias de Anfitrioas, para celebrar diversos encontros de convivencia entre colectivos, asociacións, veciñanza  e artistas e, do 30 de agosto ao 12 de setembro finalizaremos coa realización de catro novas intervencións murais en gran formato, que este ano asinan as artistas Amaia Arrazola (que pintará, do 30 de agosto ao 5 de setembro, na Escola Infantil Os Ánxeles, Brión), Julieta XLF (que atoparedes, do 4 ao 10 de setembro, na Escola Infantil A Igrexa de Ortoño, Ames), Doa Oa (que estará no Centro Comercial Os Tilos de Teo, do 5 ao 11 de setembro) e Eloise Gillow (que veredes do 6 ao 12 de setembro, na rúa Porto de Conxo, 3, en Compostela).

Estade atentas, nos próximos días iremos actualizando a web con tódalas novidades! Tamén podedes suscribirvos a nosa nova canle de Telegram e non perdervos nada!