Elas tamén Pintan

Programa feminista de arte urbana
edicións anteriores

Co fin de dar resposta á sistemática invisibilización feminina nos procesos de transformación artística da nosa cidade, así como aos discursos que a xustifican baixo a escusa da suposta inexistencia de mulleres artistas ou da igualmente falsa “menor calidade” das súas obras, en 7H Cooperativa Cultural iniciamos hai anos un proceso de investigación orientado a impugnar este relato, tan dominante nas instancias académicas dedicadas ao estudo da arte urbana coma arraigado entre profesionais do sector do urbanismo e a cultura.

Baixo o convencemento de que existen mulleres que se interesan e crean no espazo público, con traballos da mesma valía e merecedores do mesmo respecto e recoñecemento que os asinados por homes, os nosos labores de estudo e pescuda desembocaron na creación do programa artístico-educativo Elas tamén Pintan. Desenvolto co financiamento do Concello de Santiago durante dúas edicións, nos anos 2017 e 2018, foi un laboratorio de arte urbana en clave feminista orientado a concienciar á mocidade sobre as desigualdades de xénero neste eido creativo e a dotar ás mulleres máis novas dun espazo formativo e de creación libre e seguro.

Agora, co pouso das aprendizaxes adquiridas e a experiencia acumulada nestes anos, retomamos a proposta, reforzándoa e enriquecéndoa respecto á súa concepción orixinal e incorporando dun xeito máis explícito e consciente a mirada LGTBIQ+.

Para conseguilo, buscamos a colaboración de colectivos, asociacións e entidades vinculadas ao movemento feminista e LGTBIQ+, así como colectivos de mulleres en situación ou risco de exclusión social e axentes veciñais e socioculturais, especialmente dos barrios de Conxo, Santa Marta, Pontepedriña-Castiñeiriño e Vista Alegre, onde se desenvolverán as distintas accións.

Ao tempo, buscamos a implicación de 20 persoas, preferentemente mulleres de entre 14 e 30 anos ou maiores de 65, que queiran axudarnos a transformar artisticamente o barrio de Conxo a través da pintura mural e implicarse no global da proposta. O programa desenvólvese a través de tres módulos de actividades, nas que se combinan a teoría e a práctica e os formatos presencial e virtual; e unha xornada lúdico-creativa de peche.

Todas as actividades están subvencionadas polo Concello de Santiago a través da Convocatoria de axudas de apoio a actividades culturais para o sector profesional 2021, polo que a participación é totalmente de balde para as interesadas.

Inscricións en 7hcoop@7hcoop.gal

Programa

coñecer

O primeiro módulo, concíbese como un laboratorio de arte urbana no que realizaremos unha revisión colectiva da historia da disciplina con perspectiva de xénero a través de sesións baseadas na combinación da abordaxe teórica, mediante espazos de aprendizaxe e debate horizontais, coa experimentación en colectivo.

A actividade, para un máximo de 20 persoas, desenvolverase de forma presencial na Casa de Cornes (Rúa Manuel Beiras, nº3), a través de cinco sesións de dúas horas de duración cada unha. Estas serán o martes 28 e xoves 30 de setembro e o mércores 6 e os xoves 7 e 14 de outubro de 18 a 20h.

descubrir

O segundo módulo temático ten como obxectivo poñer en práctica os coñecementos adquiridos no laboratorio e trasladar os debates á rúa a través da súa (re)descuberta como plataforma de expresión e reivindicación política.

Con esta vontade e co fin de introducirnos no contexto artístico local, rachando estereotipos desde a análise de expresións artísticas que habitan a cidade, desenvolveremos dous roteiros urbanos o sábado 9 de outubro.

Unha das rutas realizarase nos barrios de Pontepedriña e Castiñeiriño e a outra transcorrerá pola Almáciga, San Roque e Vista Alegre.

crear

O terceiro bloque destínase á creación e experimentación artística en colectivo a través dun obradoiro deseñado co fin de dotar ás participantes de ferramentas e técnicas creativas para mudar o espazo público en clave feminista e desde unha perspectiva contextual.

O taller desdóbranse en dúas fases nas que as participantes conformarán dous grupos de traballo. A primeira parte, concibida en formato virtual, está centrada na investigación colectiva do contexto. Ademais das pescuda de campo, cada grupo de participantes celebrará un encontro virtual cun colectivo ou entidade do movemento feminista compostelá co fin de recoller inquedanzas e temáticas que inspiren a creación dun bosquexo artístico colectivo.

A súa plasmación realizarase na segunda fase do módulo que terá lugar nunha xornada presencial o sábado 16 de outubro no barrio de Conxo, en horario de 10 a 15 e de 16 a 19 horas.

compartir

Finalmente, a xornada lúdica de peche, que terá lugar o sábado 16 de outubro, procura visibilizar ao conxunto da cidadanía compostelá a identidade e patrimonio dos barrios de Conxo e Santa Marta a través da creación dun diálogo creativo entre as súas habitantes e sete artistas feministas do eido da arte urbana.

Dúo Amazonas, Tamara Baz, Festa, Medianeras Murales e Minia Regos serán as encargadas de realizar cinco intervencións artísticas simultáneas ao longo do día nas rúas do barrio, onde tamén deixarán a súa pegada ás participantes no programa a través dun mural participativo.

Para poñer ritmo aos diferentes procesos creativos, a veciñanza poderá gozar de balde do concerto da artista vilagarciá Catuxa Salom, previa reserva de entrada, a partir das 13h no exterior do Centro Sociocultural Aurelio Aguirre (12.30h apertura de portas) e da ruada de Somdolilá a partir das 19:00h.

máis información en

7hcoop@7hcoop.gal
inscricións